峴港—炒車

　　係峴港落機既時候係夜晚，當時我選擇左行路去Hostel。呢度俾我既第一印象就係好混亂，好落後，好第三世界。因為都好耐冇自己一個去一個語言不通既國家旅行，所以開頭都有少少淆淆地，不過好快就適應到。

　　廢話唔多講，第二日就有個比利時既鬼佬撩我揸電單車上山，佢負責揸，我負責坐後面同分擔租車費用。佢話自己早幾日先學識揸電單車，我又唔知點解會咁痴線放心交條命俾佢。

　　結果咪出事囉，不過好彩當時我唔係車上面。話說上山上到某個位條路好斜，咁我唯有落車，佢就推架電單車上去。跟住到一條分岔路，佢就想左轉，開左個引擎，結果收唔到油，成架車差D炒左落坑渠，好彩個人就冇乜事，只係有D皮外傷。

　　之後有兩男一女既越南人幫我地拉返起架車，載埋我地上山，仲帶埋我地去其他景點。本來我想請埋佢地食晚飯，不過俾佢地婉拒左。

　　話說我坐佢地車時，落車果陣唔小心"Hi"到條排氣喉，結果起左幾個大水泡，去沙灘游水既計劃都要延後。