台11

DAY10—上半日

六點起身，㩒咗陣電話先去沖涼，跟住出去食早餐。

一早己經烏雲密佈兼落微雨。

天氣差連個人精神都好似差啲咁，一直拖到九點先出發。

出發就己經落雨。

踩返去尋日換軚嗰度，今日得返零零丁丁幾個遊客。

一路踩到東河，路邊有間賣包嘅店，見有啲日本人係到排緊隊買，我都去食啲野先。

啲日本人食到係咁oishii, oishii咁，雖然真係幾好食。

跟住去到吊橋影相，過咗河有個休息區，如果冇落雨都幾適合露宿。

跟住一路踩到成功鎮再食晏，臨入市區有陣雨勁大。

未完待續......

-----------------------------------------------------------------------------------------------

DAY10—下半日

今日啲路其實都係起起伏伏。

好彩嘅係雖然落雨，但踩到晏晝有啲順風。

講返樣野，話說我踩單車一路都有個習慣，就係用腳底踩車。

我知呢個唔係正確踩法，但係有段故的。

話說當年踩去法國，我著對波鞋就出門。

踩到貴州要爬山之後，唔知點解腳底就痛，跟住換咗對行山鞋踩，都係痛。

最後我轉用腳底踩就冇再痛，不過變咗膝頭痛，但後尾膝頭都冇再痛，一路踩到法國都冇事。

可能因為著行山鞋踩，所以卸咗啲力，膝頭就冇乜野，我都唔知。

Anyway，今日我改咗呢個踩法國時留低嘅習慣，轉返腳尖踩，膝頭受嘅力少咗，就冇咁痛。

晏晝都係踩下抖下踩下抖下咁，冇咩特別。

話說點解揀踩台11，係因為以前踩去法國剩係踩內陸，只係見過湖，冇見過海。

係石雨傘有班叔叔嬸嬸叫我幫佢哋影相，知道我係香港人後叫我唔好返香港，留係台灣。

其實我都想，不過我唔係攞工作簽證，如果有飛機我都係要返香港。

踩到長濱最後都係搵間民宿住，因為今晚應該都落雨。

除咗落雨我仲忽略咗個問題，台灣濕度咁高，根本就唔係一個適合話露宿就露宿嘅地方。

我認為造成我膝頭痛嘅其中一個原因就係濕氣。

去到間民宿嘅時候見到兩個好hippie嘅女仔，然後入面乜燈都冇開，嗰刻有啲驚中伏。

好彩後尾開咗燈間民宿感覺都幾舒適，而且啲裝修都好有個人風格。

後補︰夜晚係地下浴室沖涼嗰陣，兩個hippie台妹播住歌煮野食，跟住竟然聽到LMF嘅二零一九，竟然跟得咁貼。

跟住同佢地講返，我由細聽LMF聽到大，佢地就有啲驚訝咁，可能我望落唔似會聽啲咁「叛逆」嘅歌。

今日大致係咁。

-------------------------------------------------------------------------------

是日行程︰台東 > 長濱，約78公里。