我今次實在高估咗自己嘅狀態，低估咗環島嘅難度。
五點起身沖個涼執野，六點零出發。
首先踩去台灣最南點，一路有啲逆風，朝早踩車會聞到好多草味。
後補︰好懷念嗰種朝早嘅草味，以前踩到俄羅斯、歐洲嗰邊經常會聞到。
七點幾踩到燈塔附近嘅七仔食早餐。
去到最南點遇到個電單車環島嘅台灣姐姐，傾咗幾句。
補充︰離開最南點之後就發現條軚係咁漏氣，結果又要停低換，而家兩條後備內胎都係壞，身上冇補軚工具，再爆真係玩完。
跟住一路往北踩，啲路全部都係起起伏伏，好彩啲風未到大得好誇張。
因為膝頭痛只能夠慢慢踩。
踩到海巡署停低去個廁所，有個職員話呢度己經唔俾人休息，剩係可以去下廁所。
去完廁所踩2.5公里到港口吊橋，我發現竟然漏低咗頂頭盔。
竟然犯呢啲低級錯誤！
翻上去要爬坡，一諗到就想死。
膽粗粗打去問下職員介唔介意攞頂帽俾我，答案當然係唔得。
唯一踩返上去，結果一來一回又踩多5公里。隻腳己經夠傷，仲要搞啲咁嘅野。
係吊橋附近餐廳坐低食野，開始落大雨，唯有坐下順便等雨停......
踩咗半日都只係踩咗廿幾公里......
------------------------------------------------------------------------------------
DAY7—下半日
真係不如一槍打死我。
個膝頭己經傷咗，仲要不斷上山落山逆風落雨。
踩西藏我都未試過推車，但今日好多次我都膝頭痛到要落車推。
後補︰寫嘅時候冇細心去回憶，後嚟醒起踩西藏係試過好幾次大風雪要落車推，但正常嘅天氣下就真係冇推過車，每次我都堅持慢慢踩上山。
絕望咗好多次，諗住打去租車店家叫救命算，因為點睇我都己經冇可能趕得切十五日租車時間內環到台。
但最後都係諗住踩多陣，跟住又踩多陣。
踩咗好耐先落山到港仔，到咗海邊。
有個後生仔踩電單車過嚟問我有冇需要幫忙，我話唔洗。
跟住佢問我今日要去邊，我話應該踩前少少到旭海。
佢知我係香港人，同我講聲加油就走咗。
跟住有隻黑狗走咗埋嚟，見佢咁得意摸咗佢個頭一下。
佢就係咁跟住我跑，跑到勁遠。
係咁叫佢走都唔肯走，大佬，公路嚟，我好驚你俾車撞死。
跟咗好幾公里先冇再跟嚟。
差唔多天黑岩岩好到旭海溫泉，即刻浸浸先。
我已經形容唔到有幾爽，好似死過返生咁。
跟住有個台北哥哥撩我傾計，佢都係愛好環島分子嚟。
最後打去佢介紹間民宿，開頭話1000包早餐，後尾殺到800。
其實本來就應該800咁上下，我點解知？因為早啲有個婆婆聊我去佢間民宿，開800。
今個大致係咁。
後補︰當時有段對話好有趣，個哥哥知道我係香港人後，就問我係香港邊度人。
我正想答佢嘅時候，佢就話︰「讓我猜一下，元朗人？」
我當時就O咗嘴，話︰「你怎麼知道？」
佢話成日有睇啲節目介紹元朗飲食，有留意開元朗人咩樣，話一睇就覺得我係元朗人咁嘅樣。
我心諗都係第一次聽人講話元朗人有樣睇。
------------------------------------------------------------------------------------------------------
是日行程︰墾丁街 > 旭海，約60公里。
沒有留言:
張貼留言