峴港—會安

　　話說當初黎峴港之前冇搵定Hostel，黎到先是但搵間落腳，我又唔知點解咁衝動一黎就俾左十晚錢，結果住落先知中伏。

　　間野D床單好似唔洗咁，浴室又簡陋，成間野都有陣味。雖則更差既地方我都住過，但今次唔係黎長途旅行，點都應該住好D。

　　咁過兩日我就同佢講想checkout，問佢可唔可以退款俾我，點知原來有條Policy寫住48小時通知喎。咁都冇撚計啦，人地櫃檯寫到明，鬼叫自己冇睇咩。然後就退左五晚錢俾我，跟住可以訓多兩晚。

　　結果我只係訓多晚，跟住聽越南朋友仔既建議，去會安係果邊留一晚。

　　去到先膽粗粗搵間民宿，老闆娘同佢個仔都勁Nice。佢地話冇床位，跟住就俾左間房我，剩係收我8蚊美金。間房睇落好衛生，廁所又乾淨，如果可以真係想住多幾晚，可惜我又好衝動咁一早係峴港海邊Book定另一間Hostel既床位。

　　大概一個人旅行既壞處就係衝動做錯事既時候都冇人禁住你。

　　不過，最後係會安留左一日一夜都夠哂。會安雖然係個好靚好舒服既小鎮，但實在太過商業化，太多旅客，所以我都冇興趣留太耐。

　　最後開名，果間衛生極差既Hostel叫Da Nang Backpackers Hostel。千祈唔好去!!! DON'T GO TO THIS HOSTEL!!!