峴港—Packo

　　係峴港最後五日，我就住係海邊既Packo Hostel。呢度既房間係由貨櫃改裝而成，幾有趣。

　　不過離開會安之後，就連續幾日不停落雨，本來諗住日日訓係海灘既計劃就完全失敗。

　　意料之外既係，入住當日就被邀請同Hostel既經理同員工食飯。而呢個經理只係大我一歲。

　　無意間同呢位經理交流左好多政治同社會既問題，令我對越南有更深入既了解。原來越南年輕人面對既問題同香港都相類似，譬如城市樓價高昂，年輕人同樣要用幾乎一輩子既積蓄去供樓，然後父母既傳統價值覺得子女要讀好書，從商之類啦，跟住又逼D仔女去補習。官商勾結更加唔洗講啦，越南仲要一黨專政，政府控制埋法律。

　　話說我黎越南做港豬嫁嘛，點解無啦啦又會同人講政治。

　　講返日常。有日落雨，我就全日匿係Hostel入面，剩係行過出去食Lunch。

　　之後果日我去左峴港唯一既商場，獻出左我第一次溜冰。真係唔好睇人玩得咁輕鬆，背後肯定付出左唔少努力。個職員教左我兩下基本姿勢，然後我就自己慢慢摸索。經過三個鐘既努力，叫做勉強滑到少少。

　　後來終於停下雨，就租架單車踩左去機場附近影飛機。話說當日係峴港降落時，望出窗可以清楚見到下面城市，我就諗，唔知97前D人搭飛機係咪都咁望住九龍城既呢? 然後就諗，或者我可以好似以前D人係九龍城影飛機咁，係機場附近市區影飛機降落喎。一直有呢個諗頭，直至呢日終於付諸實行。

　　結果我為左影張靚相，企係馬路邊足足等左一個鐘，其間仲有個大叔走黎煩住我，係咁叫我幫佢影相，都唔知做乜鳩。

　　跟住同鬼佬落Bar，去沙灘玩水咁啦，唔詳細說明。

　　然後，咪返香港囉。總括黎講，呢十日，好完滿結束。