前言

遊記原版係Lihkg討論區即時連載完，內容照Copy返過嚟，會比原版多少少圖片同補充。

呢個係原Post連結︰https://lihkg.com/thread/1859741/page/1

—2020年3月11日


-----------------------------------------------------------------------------

如無意外嘅話，我聽朝7:50就會搭上飛往台中嘅班機，展開台灣環島嘅單車旅程。

其實單車旅行嚟講，我已經係老屎忽，七年前就完成咗香港踩去巴黎嘅旅程。

最近因為突然有啲時間，想重拾一下嗰種係路上嘅感覺，所以就去講咗想做好耐，但都未出發嘅環台。

人生嘅野，有錢就冇時間，有時間就冇錢，所以今次係低成本，全程大部份時間會露宿。

預算如下︰機票7XX+租單車15XX+露營用品6XX+每日洗費同其他雜費21XX=約5000HKD

旅程日數，由4號到21號總共18日。希望唔會好似香港啲濕鳩工程咁超支。

最後，全力支持香港醫護人員罷工，除咗感激、感激都係感激。

希望大家都關注事件，支援香港醫護人員。

肺炎唔想出街冇野做，咪嚟睇下遊記。

就咁先。

----------------------------------------------------------------------------


出發前講少少事前準備。

其實而家環台都已經發展得好成熟，係網上都可以搵到好多資料。

環台分大圈同細圈，大圈啫係環哂成個台灣海岸線嚟踩，約12XX公里。

而細圈係踩內陸嘅路線環台，約9XX-1XXX公里。

係2015年末台灣官方推出咗環島一號線，總長939.5公里，屬於細圈。

今次我選擇嘅路線大致跟環島一號線，再稍為改動下。

係路線方面，除咗揀大圈細圈外，另一個重要嘅選擇係台東至花蓮段，選擇走花東縱谷定係花東海岸，兩邊風景各有特色，不詳述。

更詳細嘅路線可參考台灣人EDDIE CHEN寫嘅文章。

單車方面一般都會選擇租單車，當然你唔怕麻煩都可以帶自己車，純屬個人意願。

揀大廠捷安特租車嘅話，要提早兩個星期預約，其他店家規矩各有不同，最好自己同店家聯絡。

一般人環台都係台北出發，但我買平機票所以台中出發。今次揀咗馬修單車租車，佢地可以將單車運到台中俾我用，但要收兩次運費，送嚟800TWD，運返去800TWD，加租車4000TWD，總共5600TWD。

暫時講住咁多先。