攞車

Day1—上半日



尋晚瞓都冇覺就搭NA車出機場。

結果未夠五點就到機場，好似有啲早得濟。

不過都好，成個機場空盪盪，唔洗對住啲麻煩嘅人龍。

啲光太殘眼，唔係好瞓到。

聽下歌，瞌下眼睏。

七點二十分登機。

上到機好快瞓著咗，個零鐘機程瞌下眼就到咗。

對我哋啲新西牛嚟講，仲快過出港島。

係台中機場ATM撳錢，整埋張電話卡。

一出機場就係巴士站。

用Google Map search一search就搵到搭咩車去青旅。

Google Map同智能電話嘅出現，真係完全改變咗人去旅行嘅模式。

台中落緊微雨。

搭車時有個香港人坐係我隔離，係咁講電話，後尾佢用國語問我野，我話我都係香港人，就傾咗幾句計。

「你都係嚟避肺炎㗎啦下嘩？好大鑊呀而家。」

「又唔係特登嘅，咁啱囉！」我苦笑。

落車之後就行去青旅。

（用高級野）

行兩步就到，係門口撳鐘仔，有個後生仔嚟開門，佢話佢唔係員工，我唯有坐係大廳等下先。



---------------------------------------------------------------------------------------------------------------------



Day1—下半日

正所謂你唔搵政治，政治都會嚟搵你。

頭先幫我開門個後生仔，知道我係香港人後，就問我關於罷工嘅法律依據。

佢咁問我，我一時都答唔到佢。係我立場，罷工需要乜野法律依據？都罷工仲講咩法律依據？

不過為咗滿足佢，我就同佢講以前香港有集體談判權，不過後尾廢除咗。

俾個方向佢搵下資料咁，佢話唔知要做講座定做咩。不過我都同佢講咗聲多謝for關心香港。

晏晝行去附近剪咗個頭髮，150蚊台幣搞掂，唔知邊度搵，唔會剪到你好型但都唔會剪到你好柒咁。

跟住係逢甲夜市嗰頭搵野食，最後搵咗間食牛肉麵，加埋個魯肉飯食到好飽。

返到青旅實在頂唔順就瞓咗陣，醒返就去攞單車，位置有啲偏僻，搭巴士都搭咗個半鐘有多。

跟住踩十公里返青旅當熱身。

以前踩慣山地車，條粗軚抓地抓得好實，所以個感覺好穩陣。

今次踩公路車，條幼軚好似抓唔實塊地咁，感覺好浮好似隨時跌咁，開頭都有啲唔慣。

不過速度感覺真係快好多，但可能只係我係單車舖踩返落青旅係下坡所造成嘅錯覺。

今日大致係咁，完。