尋晚本嚟以為搵到個好地方瞓，點知有班後生夜麻麻嚟玩，不過後生仔冇害，就由佢繼續瞓。
瞓瞓下俾人叫醒咗，原來呢到有人睇場。點幾鐘執野走，跟住踩咗去附近勞工公園搵張長櫈瞓。
又係一瞓就勁多蚊，後尾攞返舊驅蚊嘅東東出嚟掛，其實都有啲用，起碼掛咗真係少咗蚊，雖然唔係完全冇。
瞓一陣醒一醒咁，瞓到五點起身執野出發。
後補︰大概七點幾係間七仔食早餐。
唔知係瞓得太差身體recover唔到定點，個膝頭好痛，每踩一下都係痛。
因為膝頭太痛嘅關係踩得好慢。
九點幾係間全家停低買咗啲野，跟住伏係枱度瞌咗陣。
十點起身繼續踩。
途中有兩個踩單車嘅叔叔同我講加油，佢哋唔係環島。有時一句加油，真係會俾到力量。
但膝頭仍然痛，仍然踩得好勉強。
不過慢慢踩都已經踩到海岸線。
本身今日諗住踩到台灣最南面再搵地方露宿，但我怕踩落去會以後踩唔到，決定今日去墾丁算，希望搵到間平Hostel recover一下。
打呢篇野時係途中一間全家，未完待續......
-----------------------------------------------------------------------------------------------------------
DAY5—下半日
人衰開真係會有條路。
係Family Mart食完野之後打咗去一間Hostel book位，好彩仲有位。
諗住今日撐到墾丁就夠，應該都唔會好辛苦。
膝頭痛我忍。
膝頭痛仲要上坡落坡，我忍。
膝頭痛仲要上坡落坡，跟住風大到吹郁個人，我都忍。
仲有8公里，你先嚟同我爆軚？
好啦，諗住最多咪自己換，又唔係未換過。
拆哂啲行李，攞咗條內軚出嚟，check完入面有冇野吉穿，擺返條新嘅入去，就打氣啦。
打極都打唔入嘅喂？
我完全搞唔清咩狀況，而且呢刻身心都己經差唔多到極限，己經搞咗差唔多成個鐘，五點幾就嚟天黑。
呢刻最理智嘅做法唯有係推車。
一直推，除咗灰之外都冇咩好講，唯有慶幸自己接近市區先爆。
好好彩，推推下竟然有人停車主動話要車我。一個嚟自高雄嘅爸爸，帶住個仔嚟。
呢刻除咗係咁講多謝都唔知講咩。
距離市區仲有四公里多啲，推車估計仲要行個零鐘。
係Hostel放低哂啲野後，攞架車去整，最後發現原來個打氣筒係一個壞咗嘅打氣筒。
結果又洗咗380買個新。
擺返架車返Hostel，先得閒去食野。
食完野，返去沖個涼就瞓。
最後教大家一個能醫百病嘅藥方—威士忌。
後補︰後嚟發現應該係落車之後，碼錶前輪感應嗰舊野唔見咗，跟住一路都冇碼錶睇。
------------------------------------------------------------------------------------
是日行程︰高雄市 > 恆春鎮，約90公里。
沒有留言:
張貼留言